ബീഫ്
വീട്ടില് ആഘോഷമാക്കി വച്ച ബീഫും കഴിച്ച് അതിന്റെ പലതരം സെല്ഫികള് ഫെയിസ്ബുക്കിലിട്ട് യൂ പി യിലെ ജോലിക്ക് തിരിച്ചുപോയവനാ...
അവിടത്തെ മലയാളികളായ കൂട്ടുകാര്തന്നെ കൊടുത്ത പണിയാന്നാ പറഞ്ഞുകേട്ടെ...
ഇപ്പൊ മുന്നില് തിരിയുംകൊളുത്തി ചുവരിലെ പടത്തില് ഇരിക്കുവല്ലേ... അവന് എന്തിന്റെ കേടായിട്ടാ ഇതൊക്കെ എടുത്ത് എഫ് ബീല് ഇട്ടെ...? ഇപ്പൊ രഹസ്യമായി വേണ്ടേ ഇതൊക്കെ....
രഹസ്യമായിട്ടോ....!!!
ഹരികൃഷ്ണന് ജി ജി
അമ്പിളി അണ്ണന്
'' നീയിപ്പൊ സെക്കന്റിയറല്ലേ...''
''അല്ലണ്ണാ... ലാസ്റ്റ് ഇയര്..''
കോളേജിന് പുറത്തുള്ള അമ്പിളിഅണ്ണന്റെ കടയില് ഉച്ചയ്ക്കൊരു സോഡാ സംഭാരവും കുടിച്ച് ഇരിക്കുവായിരുന്നു.
''ഞാന് രണ്ടാം വര്ഷവും മൂന്നാം വര്ഷവുമെന്നൊക്കെ കരുതിയിരുന്ന പയ്യന്മാരൊക്കെ ഇപ്പൊ അവസാന വര്ഷം ആണല്ലോടാമോനേ... നമ്മള്ടെ കച്ചോടം പൂട്ടീന്നാ തോന്നുന്നെ....''
'' പുതിയ പുള്ളേരാരും വരക്കമില്ലേ ഇങ്ങോട്ട്..?''
''അതല്ലെടാ... പറ്റ്... പറ്റെഴുതി കഴിച്ചിട്ട് പോയവക വലിയൊരു തുകയായി... അതൊന്നും കിട്ടിയില്ലെങ്കില് ഞാന് മുങ്ങിപ്പോകും...''
''ഉം...''
''ഇപ്പൊത്തന്നെ ജങ്ഷനിലോട്ടൊന്നും ഇറങ്ങാന്വയ്യ... ബസ്സിലൊക്കെ തല ഒളിപ്പിച്ചുവച്ചാ പോകുന്നെ... കടം വാങ്ങിയവരെ കാണാതേ... ജീവിച്ച് പോണ്ടേ...''
കുടിച്ച വെള്ളത്തിന്റെ കാശ് നീട്ടിയപ്പോള് അമ്പിളിയണ്ണന് ആദ്യം ശ്രദ്ധിച്ചില്ല. പിന്നെ പെട്ടന്ന് ഞെട്ടിതിരിഞ്ഞ് നോക്കി. '' ഞാന് എന്തോ ചിന്തിച്ചുപോയെടാ മോനേ..'' ചിരിച്ചുകൊണ്ട് പറഞ്ഞു...
എന്നും ചിരിച്ചു കളിച്ചുമാത്രം കണ്ടിട്ടുള്ള ആ വിചിത്ര മനുഷ്യന്റെ മറ്റൊരുമുഖം വിഷാദത്തോടെനോക്കി ഞാന് പുറത്തിറങ്ങി...
''ജീവിച്ച് പോണ്ടേടാ മോനേ....'' അയാള് ചിരിച്ചുകൊണ്ട് തന്നോടുതന്നെയെന്നവണ്ണം പൂരിപ്പിച്ചു...
ഹരികൃഷ്ണന് ജി ജി
മലയാളം
കഥ എഴുതുന്ന ഞാൻ, കവിത എഴുതുന്ന ഞാൻ, കഥ അറിയാത്തൊരു പെണ്ണിന്റെ നോട്ടത്തിൽ വീണു...! കടലിന്റെ കുരുക്കിൽ വീണ സൂര്യനെപ്പോലെ, പാത മുഴുവൻ നിറഞ്ഞു കത്തിനടന്നിട്ടും സന്ധ്യയിൽ ചുവന്ന് തുടുത്ത് അവളിൽ വീണ് അണഞ്ഞു.
പെണ്ണേതെന്ന് കണ്ണിറുക്കി ചോതിച്ച കൂട്ടരെനോക്കി മണിക്കിലുക്കം കണ്ണിലൊളിപ്പിച്ച് പറഞ്ഞു....
മലയാളം.... മലയാളം...
. ഒരു പ്രൊഫഷണല് സെല്ഫി
''കോഴ്സു കഴിഞ്ഞോ മോനേ..?''
''ഇല്ല മെയ് യില് ആണ് പരീക്ഷ''
''ക്യാമ്പസ് റിക്രൂട്മെന്റ് വല്ലതും ആയോ മോനേ..?''
''ഇല്ല ''
''സപ്ലി വല്ലതും ഉണ്ടോ..?''
''ഉം... ഉണ്ട്...''
''എന്റെ അനിയന്റെ അമ്മായീടെ സഹോദരന്റെ മകന് ബി ടെക് കഴിഞ്ഞ് ഇപ്പ ദുബായീലാ... ലക്ഷങ്ങളാ ശമ്പളം..''
''ഓ..''
''പേപ്പറൊക്കെ പെട്ടന്ന് എഴുതി എടുക്കണം കേട്ടോ..''
''ഓ..''
ഒരു ഇന്റര്വ്യൂ ബോഡിന്റെ അഭിമുഖം കഴിഞ്ഞു.... അടുത്തത് അടുത്തെങ്ങും വന്നുകയറല്ലേ ന്ന് പ്രാര്ത്ഥിച്ച് ഞാന് നടന്നു...
ഹരികൃഷ്ണന്
#മ്യൂസിയം
കുട്ടികൾക്കൊപ്പം മ്യൂസിയം പോയതാണ്. പുതിയൊരു മുറിക്കുമുന്നിൽ ആകെ ബഹളം. അകത്ത് മഴയാണത്രെ!
ക്രിത്രിമമഴ.
ആദ്യ ചുംബനം കൊണ്ടുണരുന്ന പ്രണയിനിയായ മണ്ണിന്റെ ഗന്ധമുൾപ്പെടെ കൃത്യമായി പുനർസൃഷ്ടിച്ചിട്ടുണ്ടത്രെ!
അത്ഭുതം തന്നെ.
കുട്ടികൾക്ക് ആകെ വാശി. മഴ കണ്ടിട്ടില്ലാത്തവരല്ലേ...!
തിക്കിതിരക്കി ഒടുവിൽ ടിക്കറ്റ് കൗണ്ടറിന് അടുത്തെത്തി. രണ്ടാൾക്കു മുന്നേ ടിക്കറ്റ് തീർന്നു. ഇന്നത്തെ മഴ നനയാൻ ഇനി ടിക്കറ്റില്ല. നാളത്തേയ്ക്കുള്ളത് ഓൺലൈനായി ബുക്കുചെയ്യാം എന്ന് ആരോ പറഞ്ഞു. കുട്ടികളുടെ മുഖത്ത് നിരാശയുണ്ട്. ജനിച്ചിട്ട് ഇത്രനാൾ ആയും കണ്ടിട്ടില്ലാത്തതല്ലേ.... പാവം...
നാളെ തന്നെ വീണ്ടും വരാം എന്ന് ഞാൻ ആശ്വസിപ്പിച്ചു.
ശേഷം പഴയ വേനൽമഴയുടെ സുഗന്ധത്തിലേയ്ക്ക് ഞാൻ കണ്ണടച്ചു.
#ഹരി
